Бугун, 31 май куни Қоракўл туман тиббиёт бирлашмаси негизида туманлараро қўшма шикастланиш ва юрак қон-томир маркази ташкил қилиниши муносабати билан бўлимга Франция давлатидан қиймати 2,5 млрд.сўм бўлган янги рақамли рентген аппарати олиб келинди.  Диагностика ускунаси рентген кўрсатмаларини негатив, позитив услубда ва видеога олиш имкониятига эга. Шунингдек, контраст модда юборилганда дақиқаларни ўзи ҳисоблайди, тасвирларни бир-бири билан таққослай олади. Бу ускунада беморни 90 дан 180 градусгача бўлган радиусда рентгенга олиш имконияти бор. Бу эса шифокорларга айрим касалликларга ташҳис қўйишга қулайлик яратади. 

Рентген аппарати беморнинг катта ёки кичик ёшда, тўлишган ёки озғинлигига қараб ҳам нурни танлаб узатиш хусусиятига эга. Бошқарув пультида замонавий мультифарматли, икки камерали термографик принтери ёрдамида рентгенни плёнкага тушириб, плёнкани икки хил ўлчамдаги негатаскоп орқали кўриш имконини яратиб беради. Ушбу қурилма махсус хонага ўрнатилган бўлиб, бошқарув пулти хонаси орқали беморнинг ҳолатини кўриш учун замонавий янги кузатув камераси ва видеомонитор билан жиҳозланган. Шунингдек хонага симсиз 4G тезликда ишлайдиган WiFi қурилмаси ўрнатилиб, интернет тармоғига уланди. Мазкур рақамли рентген ускунасида замонавий билимларга эга бўлган ёш ва салоҳиятли мутахассислар фаолият олиб бормоқда.

Маълумот ўрнида, аввалги рентген аппарати “Янгибозор” МФЙда жойлаган 58 ОПга ўрнатилган ҳамда мазкур маҳалла ва унга ёндош ҳудудлар аҳолисига хизмат кўрсатади. Туман марказий касалхонасига МРТ аппарати ҳам келтирилган бўлиб, яқин кунларда ўрнатилади. Бу орқали туман аҳолисининг 80 км йўл босиб вилоят марказига боришларига эҳтиёж қолмайди.

Шу куни рентген аппаратининг иш жараёни билан туман ҳокими Хуршид Тохиров ҳам яқиндан танишди.