Ўтган йили тасодифан каустик сода ишқорини ичиб қўйган 4 ёшли Умаржон Абдураззоқов қизилўнгачнинг чандиқли торайиши туфайли вақт ўтиб умуман овқатлана олмай қолганди.

Шундан сўнг жажжи бемор Республика шошилинч тиббий ёрдам илмий марказига олиб келинди. Дастлаб унинг ошқозонига махсус найча ўрнатилиб, муаммо вақтинчалик бартараф этилди. Кейинги босқичда унда мураккаб операция ўтказилиши зарурлиги Умаржоннинг яқинларига тушунтирилди. 

Бироқ ота-она фарзандини хорижда даволатишга қарор қилди. Аммо чет эл клиникасида ўтказилган амалиётдан сўнг ҳолат янада жиддийлашди. 

Умаржон яна Республика шошилинч тиббий ёрдам илмий марказига келтирилди. Аниқланишича, хорижда операция вақтида болакайда қизилўнгач ошқозоннинг ўзидан ясалиб, яъни ошқозон юқорига кўтарилиб, қизилўнгач қолдиғига улаб қўйилган. Оқибатда ушбу “янги” трансплантант юракка босим ўтказиб, уни сиқиб қўйган.

Тиббиёт фанлари доктори, профессор Ҳабибулла Оқилов бошчилигидаги мутахассислар томонидан ўтказилган операция қарийб 5 соат давом этди. Юртимизда илк бор бажарилган ушбу ўта мураккаб амалиётда ошқозон қайта жойлаштирилиб, йўғон ичакдан янги қизилўнгач шакллантирилди. Ҳозир боланинг аҳволи яхши. Шу кунларда оиласи бағрига қайтади.

ССВ Матбуот хизмати томонидан шу ҳақда тайёрланган видеолавҳа билан яқин вақтларда танишасиз.